Общество

Cуддзя, які адмовіўся судзіць затрыманых на Акрэсціна, пайшоў працаваць у адвакацкае бюро

На сайце аднаго з адвакацкіх бюро з'явілася старонка Аляксея Кісляка — цяпер ён памочнік адваката. Да нядаўняга часу Кісляк працаваў суддзёй у Ленінскім раёне Мінска, піша Наша Ніва.

Сам Кісляк адмовіўся ад любых каментароў, але па юрыдычных колах ходзіць такая гісторыя: маўляў, ён адмовіўся ехаць на Акрэсціна ў гарачыя дні жніўня і судзіць там людзей па палітычных пратаколах.

Больш да яго з такімі просьбамі не звярталіся, але і магчымасці працаваць у сістэме ўжо не было, бо начальства не задаволенае такой пазіцыяй.

Да жнівеньскіх падзей Кісляк, як і іншыя суддзі, перыядычна разглядаў палітычныя справы па 23.34 КаАП. За перадвыбарчыя і антыінтэграцыйныя пікеты ён прысуджваў штрафы Эдуарду Пальчысу, Уладзіміру Арлову, Мікалаю Статкевічу і іншым, на агульную суму каля 14 тысяч рублёў. Але суткі не даваў.

Пераход суддзяў у адвакатуру — даволі пашыраная практыка. Але з 2020 года існуюць пэўныя праблемы з трапленнем на адвакацкую стажыроўку і з атрыманнем адвакацкай ліцэнзіі, якую выдае спецыяльная камісія.

Оцените статью

1 2 3 4 5

Средний балл 5(21)