«Будзьма» выпусціла паштоўкі паводле нашумелага анімацыйнага фільма

Сёлета споўнілася 5 гадоў легендарнаму анімацыйнаму мультфільму пра «шалёны народ» «Будзьма беларусамі, альбо Гісторыя Беларусі за 5 хвілін».

Гэта быў першы прафесійны анімацыйны фільм па гісторыі Беларусі, у якім у лёгкай і забаўляльнай форме апавядалася пра самыя адметныя моманты нашай мінуўшчыны. За ўвесь час мульт сабраў больш за мільён праглядаў, атрымаў шмат прэмій і нават увайшоў у тoп-10 праглядаў на Youtube і топ-3 на Yandex!

Кампанія прапаноўвае і дзецям, і дарослым своеасабліва адзначыць першы юбілей мультфільма, узяўшыся за алоўкі. Так-так, з нагоды 5-годдзя паводле сюжэтаў мультфільма «Будзьма беларусамі!» выдадзены камплект размалёвак, які складаецца з 12 паштовак.

Цяпер кожны можа размаляваць на свой густ найбольш яскравыя падзеі з даўнейшых часоў і да 1991 года: дахрысціянская Беларусь і Вялікае Княства Літоўскае, Ефрасіння Полацкая і Вітаўт Вялікі, Францішак Скарына і Уршуля Радзівіл, паўстанне Касцюшкі і Адраджэнне, абвяшчэнне БНР і беларусізацыя ў БССР, з’яўленне незалежнай Рэспублікі Беларусь.

Дарэчы, упершыню расфарбоўкі з’явіліся ў ЗША ў канцы ХІХ стагоддзя. Яны выдатна падыходзілі як для адукацыйных мэтаў, так і для аздараўленчых. З іх дапамогай дзеці даведваліся новыя цікавосткі пра свет, а дарослыя перамагалі стрэс.

Размалёвак уласна беларускіх, тым больш разлічаных і на дарослых, і на дзетак, пакуль няшмат.

Ідэя: ГКК «Будзьма беларусамі!»

Карэтар К.Маціеўская

Дык давайце расквецім гісторыю нашай краіны разам!

Набыць камплект паштовак-размалёвак можна ў наступных крамах:

Мінск, Акадэмкніга (пр-т Незалежнасці, 72); Цэнтральная кнігарня (пр-т Незалежнасці, 19); Веды (вул. К. Маркса, 36); Кнігарня пісьменніка (вул. Казлова, 2); Светач (пр-т Пераможцаў, 11).

Гародня, “Праметэй” (вул. Савецкая, 10).

Маладзечна, “Спадчына М” (вул. Прытыцкага, 7).

Полацк, “Светач” (вул. Камуністычная, 21).

Бабруйск, “Крыніца ведаў” (вул. Горкага, 31).

А таксама замовіць у інтэрнэт-краме knihi.by.