Больш за трох не збірацца

Беларускім краязнаўцам не дазволілі аб’яднацца ў сваю арганізацыю. Міністэрства юстыцыі не зарэгістравала рэспубліканскае грамадскае аб’яднанне «Беларускае краязнаўчае таварыства», спаслаўшыся на рашэнне Рэспубліканскай камісіі па рэгістрацыі і перарэгістрацыі грамадскіх арганізацый і не патлумачыўшы прычынаў адмовы.

Устаноўчы з’езд грамадскага аб’яднання краязнаўцаў прайшоў у Мінску ў сакавіку мінулага года. На ім прысутнічалі больш за сотню дэлегатаў. Кіраўніком абралі былога міністра інфармацыі і дыпламата Анатоля Бутэвіча. Аднак спадзяванні на тое, што колішнія заслугі спадара Бутэвіча паспрыяюць легалізацыі арганізацыі і нават атрыманню дзяржаўнай дапамогі, не спраўдзіліся. Хоць, па словах паэта і перакладчыка Анатоля Бутэвіча, падчас падачы на рэгістрацыю патрэбных дакументаў “ніводны радок не выклікаў нараканняў з боку чыноўнікаў”.

Краязнаўцы так і не дачакаліся ад чыноўнікаў тлумачэнняў. Але ўдакладняць падрабязнасці, выкарыстоўваючы свае сувязі ў дзяржаўных структурах, Анатоль Бутэвіч не збіраецца.

— Гэта супраць закону. Да таго ж, здабытую такім чынам інфармацыю, усё роўна нельга лічыць афіцыйнай, — паведаміў спадар Бутэвіч “Салідарнасці”.

Цікава, што ў абласных і нават раённых цэнтрах, дзе краязнаўцаў набярэцца не больш за трох чалавек, існуюць мясцовыя арганізацыі. Нядаўняе рашэнне Мінюста пазбаўляе іх магчымасці абменьвацца інфармацыяй і праводзіць больш грунтоўныя даследаванні па гісторыі роднага краю. Між тым, аб’яднанне намаганняў краязнаўцаў усёй краіны паспрыяла б стварэнню прывабнага для замежных турыстаў нацыянальнага турыстычнага прадукта, пра што ішла размова на нядаўняй калегіі Міністэрства спорта і турызма. Пакуль жа, па словах намесніка міністра Чэслава Шульгі, толькі 40 працэнтаў беларускіх дастапомнасцей “маюць сваю легенду”.