Благасфэра пра гей-парад
Першы менскі гей-парад, што адбыўся ў суботу, не прайшоў незаўважаным для беларускіх блогераў. Найвялікшая дыскусыя наконт станоўчасьці такога мэрапрыемства разгарнулася на суполцы minsk_by. Што яднала ўдзельнікаў дыскусіі, дык гэта “нябачны раней дэмакратызм” уладаў, якія дазволілі мэрапрыемству адбыцца.
Што й казаць, дзіўна, памятаючы, як нашыя бравыя
АМАПаўцы клалі тварам на асфальт удзельнікаў бяскрыўднай “Крытычнай масы”, якія
толькі й вымагалі, што сьцежак для раварыстаў ды паважлівага стаўленьня да іх з
боку кіроўцаў машынаў. А тут, па сутнасьці, выхад прадстаўнікоў сэкс-мяншыняў з
падпольля, якія прайшлі ад плошчы Якуба Коласа да скверыка насупраць
рэзыдэнцыі, то бок “самым забароненым” (для апазыцыі) маршрутам, не прыцягнула
ніякай увагі. Вось гэта й
абмяркоўвалі блогеры.
Што й казаць, стаўленьне да сэкс-мяншыняў у нас
благое, і гэта было відавочна адлюстравана
ў стужцы. Толькі некаторыя ўдзельнікі ўхвалілі сам факт параду, не ўхваляючы
прапаганды ідэяў ягоных удзельнікаў, а некаторыя дык і ўвогуле схіляліся да
таго, што такія рэчы варта было б забараніць. Праўда, настроеных радыкальна
станоўча й радыкальна адмоўна было мала, што, ў прынцыпе, не зьмяніла настрою
дыскусіі.
У працяг тэмы palitekanom апублікаваў
на by_politics
спасылку на сьпіс самых зацятых праціўнікаў сэкс-мяншыняў. Што характэрна, у
яго трапілі як прадстаўнікі ўладаў, так і прадстаўнікі апазыцыйных
арганізацыяў.
На тэму парлямэнцкіх выбараў у Летуве рэфлексуе lipski. Па ягоных словах, летувіская дэмакратыя “…па сваіх практыках не нашмат адрозніваецца ад беларускай”. Было і “…адкрытае галасаваньне (кабінкі без фіранак), і пакупка галасоў (людзі з бюлетэнямі галасуюць у машынах), і п'яныя выбарцы, і нядопуск назіральнікаў на ўчастак”. Праўда, падмены скрыняў або падкідаў бюлетэняў не было, кажуць блогеры ў камэнтарах, бо ўсё-ткі ўзровень іншы.
<Дыскусыя наконт беларускамоўнай Вісты працягваецца вось тут. Як высьветлілася, беларускамоўны інтэрфэйс для Vista Ultimate усё-ткі існуе. Вось толькі спампоўваць яго трэба адмыслова з бачыны Мікрасофт, у той час, як іншыя моўныя інтэрфэйсы даступныя ў сьпісе неабавязковых аднаўленьняў сыстэмы.
Оцените статью
1 2 3 4 5Читайте еще
Избранное