Благасфэра пра амэрыканскіх акторак ды крызу ў “Маладым Фронце”

Калі памежныя службы ў беларускім аэрапорце “завярнулі” назад дзьвюх акторак з ЗША ды Аўстраліі, якія прыехалі па запрашэньні “Вольнага тэатру”, гэта на тле “лібералізацыі” падалося шаленствам. Але гэтае шаленства цалкам упісваецца ў візэрунак краіны, які ўтварыўся за мяжой. І некаторыя беларускія блогеры адрэагавалі на гэта так, што стала зразумела: у некаторых з нашых людзей выпрацавалася калі й не абыякавасьць, то пэўны імунітэт да падобных рэчаў.

У камэнтарах да посту chertenok_dnb большая частка блогераў выказвалася ў рэчышчы, што, маўляў, няма чаго сюды лятаць бязь візы, паспалітым беларусам у візах адмаўляюць хіба ня кожны дзень. Мала хто зьвярнуў увагу на тое, што акторкі мелі юрыдычнае права атрымаць візы ў аэрапорце; замест гэтага ўдзельнікі дыскусіі наракалі на дзеяньні іншаземных памежных службаў у дачыненьні да сябе. Частка камэнтатараў таксама аспрэчвала права аўтаркі ставіць допісы падобнага кшталту на суполку, то, у прынцыпе, не навіна для by_politics, якая зь месца якаснага абмеркаваньня навінаў пераўтварылася за апошні час у своеасаблівы міжсабойчык.

Пытаньне toshirskij наконт “вынікаў даўгога ўзаемадзеяньня з прадстаўнікамі іншых нацыянальнасьцяў, што жывуць у Беларусі”, дастала болей станоўчага адказу: не сказаць, каб бальшыня адназначна прыхільна паставілася да іншаземцаў, але ўсё-ткі прызнавала, што іншая культура – гэта папросту іншая культура.

Тэму расколу ў Маладым Фронце, якую сеціўная супольнасьць пачала абмяркоўваць пасьля публікацыяў лістоў невядомых “сяброў Фронту” ў Інтэрнэце, камэнтуе адзін зь ягоных лідэраў Іван Шыла. Камэнтары да адкрытага ліста былога палітвязьня Эніры Браніцкай наконт становішча ў “Фронце” ды ролі ў ім Цімафея Дранчука можна прачытаць вось тут.

І, каб скончыць на станоўчай ноце: апэрацыйная сыстэма Vista, лінейка Ultimate (гэта самая прасунутая й самая дарагая варыяцыя зь Вістаў) мае на дадзены момант вельмі якасна зробленую беларускую вэрсыю. Абмеркаваньне на тэму беларусіфікацыі вядзецца на блогу Алеся Мазаніка, чалавека, вядомага прасоўваньнем беларускамоўных праграмаў.