БАЖ уганараваў пераможцаў конкурсу «Вольнае слова»
14 сакавіка ГА «БАЖ» уганараваў пераможцаў творчага конкурсу «Вольнае слова», які ладзіўся напрацягу ўсяго 2007 года. 11 лаўрэатаў у намінацыях «Найлепшы інфармацыйны матэрыял», «Найлепшая аналітычная публікацыя», «Лепшая публікацыя літаратурна-мастацкага жанру», «Дэбют» атрымалі памятныя дыпломы і грашовыя прэміі.
«Мэта гэтага конкурсу — павышэнне прафесійнага ўзроўню беларускіх журналістаў, — зазначыў старшыня журы Юрась Карманаў. — Асабліва гэта важна ва ўмовах, калі мы назіраем дэвальвацыю паняцця «журналістыка». Ва ўсім цывілізаваным свеце яна закліканая інфармаваць грамадства і кантраляваць уладу. У Беларусі ж журналісты выступаюць у якасці прапагандыстаў, піяршчыкаў, агітатараў, але не выконваюць сваіх асноўных функцый», — канстатаваў Ю. Карманаў.
Па словах Ю. Карманава, тэксты — пераможцы конкурсу якраз з’яўляюцца яскравымі прыкладамі якаснай журналістыкі.
Журналісту ўсё часцей даводзіцца балансаваць паміж аб’ектыўнай журналістыкай і інфармацый, якая «не пашкодзіць» яго выданню. Такім назіраннем падзяліўся ўладальнік другой прэміі ў намінацыі «Найлепшы інфармацыйны матэрыял» Руслан Гарбачоў («Intex-press», Баранавічы).
«Адзнака калегаў-прафесіяналаў — вельмі важная, бо яны ацэньваюць нашы артыкулы кіруючыся не эмоцыямі, а ведамі, прафесіяналізмам, карпаратыўнай этыкай і г.д.», — зазначыў яшчэ адзін уладальнік другой прэміі ў «інфармацыйнай» намінацыі Глеб Лабадзенка («Комсомольская правда» в Белоруссии»).
«Тое, што ў межах конкурсу «Вольнае слова» прэмію атрымаў эканамічны матэрыял, — гэта вялікая перамога беларускай эканомікі», — пажартавала Алена Наважылава («Белорусские новости», БелаПАН), якая заняла трэцяе месца ў намінацыі «Найлепшы інфармацыйны матэрыял». «Палітычная і сацыяльная тэматыка больш прывабная для чытача. Цешыць тое, што на старонках «Белорусских новостей» эканоміка набывае дастаткова шарму, каб прыцягнуць і захапіць не толькі чытача, але і журы», — рэзюмавала А. Наважылава.
Пераможца намінацыі «Найлепшая аналітычная публікацыя» Валеры Карбалевіч («СНплюс. Свободные новости плюс») пажадаў усім калегам «дажыць да таго часу, калі журналісты не будуць змагацца за свабоду, а будуць проста журналістамі».
Уладальнік другой прэміі ў «аналітычнай» намінацыі Віталь Тарас («Наша Ніва») прызнаўся, што разглядае журналістыку не як прафесію, а як «хобі на ўсё жыццё». «Мне з юнацтва здавалася: як гэта здорава — збіраць інфармацыю, аналізаваць яе… А калі за гэта яшчэ і грошы плацяць, а часам яшчэ і прэміі даюць — гэта проста найшчаслівейшыя моманты жыцця!».
«Радасна, што з’явіліся ў беларускай журналістыцы новыя імёны, але цешыць і тое, што «старыя байцы» таксама не губляюць «формы», — канстатаваў Віталь Цыганкоў (Радыё «Свабода»), які заняў трэцяе месца ў намінацыі ««Найлепшая аналітычная публікацыя». «Спадзяюся зноў праз год сустрэцца тут з вамі», — дадаў журналіст, маючы на ўвазе намер ўдзельнічаць у наступным этапе конкурсу.
Сапраўды, ў 2008 годзе конкурс «Вольнае слова» будзе працягвацца. Пра гэта нагадала калегам старшыня БАЖ Жанна Літвіна, заклікаўшы ўсіх гасцей запусціць у паветра папяровыя самалёцікі — сімвал конкурсу.
Пасля гэтага перад журналістамі выступіў знакаміты беларускі бард Алесь Камоцкі.
Нагадаем поўны спіс намінацый і пераможцаў конкурсу «Вольнае слова»:
Найлепшы інфармацыйны матэрыял
1 месца:
АЎТАР: Зміцер ПАНЯМОНАЎ («Еўрапейскае радыё для Беларусі»)
ТЭКСТ: «На плошчы Незалежнасці паклалі радыёактыўную плітку»
2 месца:
АЎТАР: Руслан ГАРБАЧОЎ («Іntex-press», Баранавічы)
ТЭКСТ: «Как я был инвалидом»
АЎТАР: Глеб ЛАБАДЗЕНКА («Комсомольская правда» в Белоруссии»)
ТЭКСТ: «Белорусское молоко разошлось в Смоленске за 15 минут»
3 месца:
АЎТАР: Алена НАВАЖЫЛАВА («Белорусские новости», БелаПАН)
ТЭКСТ: «С новым газом, Беларусь!»
Найлепшая аналітычная публікацыя
1 месца:
АЎТАР: Валеры КАРБАЛЕВІЧ («СНплюс. Свободные новости плюс»)
ТЭКСТ: «Инфляция оптимизма»
2 месца:
АЎТАР: Віталь ТАРАС ( «Наша Ніва»)
ТЭКСТ: «Данайскія дары»
3 месца:
АЎТАР: Сяргей ЗАКОННІКАЎ («СНплюс. Свободные новости плюс»)
ТЭКСТ: «Здаровы сэнс падказвае»
Лепшая публікацыя літаратурна-мастацкага жанру
1 месца:
АЎТАР: Сямён ПЕЧАНКО («Наша Ніва»)
ТЭКСТ: «Дзікар і Джулія»
2 месца:
АЎТАР: Алена ЧЭБ («Брестский курьер»)
ТЭКСТ: «Мелочи семейной жизни, или Уикенд без права на отдых»
3 месца:
АЎТАР: Віталь ЦЫГАНКОЎ ( Радыё «Свабода»)
ТЭКСТ: «Нацыянальная ідэя ўлады — «жывіце і ня думайце»
Намінацыя ДЭБЮТ
АЎТАР: Зміцер ПАНКАВЕЦ («Наша Ніва»)
ТЭКСТ: Міхаіл Герчык: «Не спадзяваўся выбрацца адтуль» (Быхаў-Менск)
Оцените статью
1 2 3 4 5Читайте еще
Избранное