6 жніўня — прэзентацыя «Вялікага Княства Літоўскага»

Цэнтральная навуковая бібліятэка НАН Беларусі (Сурганава, 15). 16.30.

Як паведаміў НН пісьменнік Уладзімір Арлоў, багата ілюстраваны том «Вялікае Княства Літоўскае», які яны падрыхтавалі ў супрацы з мастаком Змітром Герасімовічам, будзе прэзентаваны 6 жніўня. Імпрэза пройдзе ў Цэнтральнай навуковай бібліятэцы імя Якуба Коласа НАН Беларусі (Сурганава, 15). Пачатак, а 16.30.

Чакаецца, што ў прэзентацыі возьмуць удзел не толькі аўтары, але і гісторыкі Анатоль Грыцкевіч і Уладзімір Ляхоўскі, навуковы рэдактар кнігі Зміцер Санько. Вядома ж, можна будзе набыць кнігу.

Яе прыкладная цана складае 350 тысяч.

Шыкоўна выдадзенае «Вялікае княства» — нібы працяг кнігі Арлова і Герасімовіча «Краіна Беларусь», што выходзіла 5-тысячным накладам і цалкам раскупілася. Гэта сапраўдны даведнік па часах ВКЛ і не толькі. Кніга пачынаецца матэрыяламі аб суіснаванні балтаў і славянаў на беларускіх землях, а сканчаецца сённяшнім днём беларусаў у Літве.

«Дзень для прэзентацыі быў абраны невыпадкова, — адзначае Уладзімір Арлоў. — Якраз 6 жніўня Францыск Скарына выдаў першую беларускую друкаваную кнігу».

У сувязі з гэтым бібліятэка наладзіць выставу гістарычнай літаратуры, якую наведнікі прэзентацыі змогуць пабачыць.