Побач з Курапатамі будуюць рэстаран з відам на лагер смерці (фота)
Побач з Курапатамі дабудоўваецца забаўляльны комплекс. Аграмадны рэстаран, цудоўны дзіцячы гарадок, баня... Ды не простая, а з банкетнай залай...
І ўсё гэта з відам на апошні прытулак бязвінна забітых. З відам на лагер смерці.
Курапаты -- лясное ўрочышча на паўночна-ўсходняй мяжы Мінска, дзе выяўлена самае буйное ў сталіцы пахаванне расстраляных у канцы 1930 - пачатку 1940-х гадоў. Гэта страшнае месца, дзе карнікі «самай справядлівай у свеце Савецкай дзяржавы» паставілі знішчэнне людзей на канвеер. Польскія даследчыкі лічаць, што гэта можа быць тое самае месца, дзе пахаваны расстраляныя з так званага «беларускага катынскага спісу».
І вось літаральная побач з гэтай калектыўнай магілай рыхтуецца адчыніць дзверы «Бульбаш-холл». Забаўляльна-рэстаранны комплекс з відам на лагер смерці.
Колькасць ахвяраў, што пакояцца ў Курапатах, даладна не вядомая. Па розных ацэнках, яна можа складаць да 7 тысяч чалавек (па дадзеных, агучаных у свой час Генеральным пракурорам Алегам Бажэлкам), да 30 тысяч чалавек (па дадзеных, агучаных Генеральным пракурорам БССР Генадзем Тарнаўскім), да 100 тысяч чалавек (у адпаведнасці з даведнікам «Беларусь»), да 250 тысяч (па дадзеных прафесара Уроцлаўскага універсітэта Здзіслава Вінніцкага) і больш (па дадзеных брытанскага гісторыка Нормана Дэвіса). Беларуская ўлада не палічыла магчымым пабудаваць тут помнік ці хаця б каплічку, нейкі мемарыяльны знак. Тут стаяць толькі простыя драўляныя крыжы, ўсталяваныя рукамі простых людзей, рукамі тых, хто і сёння не ведае, дзе пакояцца іх бацькі і дзяды, якім не пашчасціла трапіць пад малох крыважэрнай сістэмы.
А літаральна праз дарогу хутка будзе гудзець весялосць. Рэстаран на 400 месцаў, вялікая баня з банкетнай залай, дзіцячы гарадок, асобныя домікі для інтымнага адпачынку... Праект рэалізуе кампанія з назвай "Наша рэстаранная група". Ёй належаць мінскія «Кушавель», «Тусэ», «Дача».
Кампанія даўно анансавала вялікія планы таго, як накорміць і пацешыць Мінск, пашыраючыся на адзін-два рэстараны ў год. Але хто мог падумаць, куды зойдуць гэтыя планы?
Яны ахопліваюць усё новыя нішы рынку. «Кушавель» на праспекце Пераможцаў гэта ўстанова адкрыта арыентаваная на багатых і дарослых, «Тусэ» на Сурганова гэта хутчэй клуб, «Дача» на Лагойскім тракце -- досыць дэмакратычнае, але не таннае кафэ з салёнымі агурочкамі, «Бульбаш-холл» будзе установай для карпаратываў. І вось месца знайшлі...
Ці было б магчымым з'яўленне такой установы ля смаленскага месца растрэлаў -- Катыні? Ці магчыма было б такое ў Баб'ім Яры? Ці прыехаў бы хто ў рэстаран Асвенцыма? Свет гудзеў бы ад абурэння, ад такой праявы нялюдскасці. А ў сучаснай Беларусі можна ўсё. Кампанія, якая актыўна рэкламуе свае магчымасці па арганізацыі суперсвятаў, прыйшла ў Курапаты.
Дарэчы, межы Курапацкага ўрочышча растрэлаў дакладна не вызначаны. Ёсць сведчані, што калі пракладвалі кальцавую дарогу, выкопвалі чалавечыя косткі. Такім чынам, у «Бульбаш-холе» ў прамым сэнсе будуць танчыць на касцях.
Але кампанія ўжо анансуе: «Хутка адкрыццё!» Да навагодніх карпаратываў паспець спяшаюцца.
Оцените статью
1 2 3 4 5Читайте еще
Избранное