Дашкевіч піша пра катаванні (фота)

Уладзімер Палажанка, бацька Насты Палажанкі, атрымаў ліст ад зьняволенага лідэра «Маладога фронту» Зьмітра Дашкевіча.

– Трэба пабачыць Марыну як найбольш тэрмінова, — піша Дашкевіч пра сустрэчу з адвакатам.

Уладзімер Палажанка заявіў "Свабодзе", што 26 верасьня адвакатцы Марыне Кавалеўскай не пацьвердзілі, але і не абверглі інфармацыю пра тое, што Дашкевіч знаходзіцца ў Магілёўскім СІЗА.

Кавалеўскай прапанавалі прыехаць і высьвятляць гэтае пытаньне на месцы.

Адвакатка паедзе ў Магілёў у аўторак 27 верасьня.

13 верасьня Дашкевіч паведаміў адвакату, што распачынае галадоўку, якая будзе цягнуцца, пакуль адміністрацыя калёніі ня выканае шэраг ягоных патрабаваньняў.

Ліст ад Дашкевіча

"Насьцюленька!

Пішу табе з адстойнікаў магілёўскай турмы. Дзе апынуся раніцай, ня ведаю. Адваротны адрас пакажа.

Да лепшага зьмяніцца сытуацыя ў Горках не пажадала. Зусім наадварот. Сказаць, што зьмянілася яна да горшага — не сказаць нічога…. Вызначылі мне тамтэйшыя такую кабалу, зь якое, пэўна, я ўжо і ня выберуся…

Трэба пабачыць Марыну як найбольш тэрмінова.

Неяк трэба ўсё перажыць, але як? Ня ведаю і сам….

18—19.09.2011, 1.50

PS. Калі дойдзе да цябе гэты мой допіс, буду я ўжо ў нейкім іншым месцы. Гэтае ж вельмі падобнае да Жодзіна. Тут я да 22—23 чысла. Цудоўны горад, цудоўны будынак, цудоўныя пакойчыкі. Спаў за 2 сутак 1,5 гадзіны і еў 0,5 раза. Але болей і ня лезе, ні сон і ні ежа. Мазгаўня мая дыміць і душа не знаходзіць спакою.

Дай Бог, каб вы з Марынаю дабраліся да мяне хутчэй, чым мае лісты да вас…".