Макей згадваецца ў нататніках расійскага кампаньёна Беразоўскага. Шмат беларускіх запісаў
У Расіі буйны скандал, які можа перакінуцца на Беларусь: расійскія сілавікі заявілі пра раскрыццё сеткі падпольных казіно, сляды ад якой вядуць да БАБ. І пра захоп шматлікіх дакументаў.
14 лютага расійская міліцыя заявіла пра раскрыццё сеткі падпольных казіно ў Маскоўскай вобласці. Скандал стаў абрастаць падрабязнасцямі. Аказалася, што сетку крышаваў намеснік пракурора вобласці.
Арганізатарам сеткі выступаў нейкі Іван Назараў. У гэтага 30-гадовага дзялка сканфіскавана шмат каштоўнасцяў і дакументаў. Міліцыя пайшла па ланцужку абшукваць офісы бізнэсоўца.
У яго цэнтральным офісе ў галерэі «Трыумф» у цэнтры Масквы знайшліся карціны Пікаса і Рэмбрандта агульным коштам звыш пяці мільёнаў даляраў.
Тамсама было больш за 60 пячатак фірмаў-аднадзёнак, а таксама цэлыя стосы дакументаў, якія следства звязвае са збеглым алігархам Барысом Беразоўскім. У гэтым сама памяшканні раней змяшчаўся Дом прыёмаў кампаніі Беразоўскага, што называлася «Логоваз».
Што цікава, частка гэтых дакументаў адразу трапіла ў СМІ. Іх апублікавала «Комсомольская правда». Гэта паказвае, што за скандалам можа нешта стаяць. І што таксама цікава — частка апублікаваных дакументаў датычаць Беларусі.
У прыватнасці, выяўлены нататнік. Паводле «Комсомольской правды» ён мог належаць самому Беразоўскаму. Але аналіз даступных старонак з яго сведчыць хутчэй пра тое, што ім мог карыстацца Назараў ці іншая давераная асоба збеглага алігарха. «Узнать для Борі» — гаворыць адзін з запісаў.
У нататніку Беразоўскага ці ягонага кампаньёна згадваюцца беларускія справы
На адной з апублікаваных старонак ёсць выразныя занатоўкі, дзе згадваецца Макей (прозвішча супадае з прозвішчам кіраўніка Адміністрацыі прэзідэнта Беларусі, які лічыцца лідарам празаходняй групоўкі ў атачэнні Лукашэнкі). Побач згадваюцца «Белнафтахім», адносіны Беларусі з Грузіяй і Клаўс Мангольд — кіраўнік Усходняга камітэта нямецкай эканомікі, які бываў у Мінску. На другой старонцы, у ліку аперацый у краінах былога СССР згадваецца пасёлак у Мінску.
Аператыўнікі адзначаюць, што многія знойдзеныя паперы Барыса Беразоўскага (які цяпер жыве пад новым іменем Платон Яленін) датаваныя канцом 2010 года. Нагадаем, з 20 верасня 2001 года ён знаходзіцца ў вышуку ў РФ і афіцыйна пражывае ў Лондане.
Па словах былога вязня беларускага КДБ амерыканскага адваката Эмануіла Зельцэра, Беразоўскі асабіста ўдзельнічаў у судзе над ім два гады таму. Фільм НТВ «Хросны бацька» гаварыў пра сувязі між Лукашэнкам і Беразоўскім.
Цяжка сказаць, ці сапраўдныя гэтыя дакументы. Калі яны праўдзівыя, гэта сведчыць пра сувязі найвышэйшых беларускіх чыноўнікаў з сумнеўнымі дзялкамі. Калі яны сфальшаваныя, гэта азначае шматхадовую камбінацыю расійскіх спецслужбаў, скіраваную супраць кіраўнікоў Беларусі.
У кожным разе, іх публікацыя — гэта ўдар па рэпутацыі Уладзіміра Макея і Аляксандра Лукашэнкі.
Оцените статью
1 2 3 4 5Читайте еще
Избранное