Лявон Вольскі: “Ён атрымаўся абсурдны, як наша жыццё!”
24 ліпеня Лявон Вольскі прэзентаваў свой сольны альбом “Куплеты і прыпевы” невялікім канцэртам у гандлёвым цэнтры “Рыга”. Сам спявак абазваў праект “брутальным трэш-шансонам”.
“Альбом атрымаўся брутальны і жорсткі з аднаго боку, тэатральны і гумарыстычны з другога. Шмат хто скажа, што ён абсурдны, і Лявон Вольскі першы пагадзіцца з гэтым. “Так, ён абсурдны. Такі ж абсурдны, як наша жыццё! Толькі на мастацкі лад”, – сцвярджае спявак на сваім сайце.
На такую творчасць Вольскага натхніла сама рэчаіснасць: “Шмат хто задаваў пытанне, як мы дакаціліся да такога жыцця, да ідэі гэтага альбому... Дакаціліся мы нядоўга. Дастаткова проста паглядзець тэлевізар, газеты, інтэрнэт...”
Размова з гледачамі ў Вольскага атрымалася як і самі “Куплеты і прыпевы”, шчыра і з гумарам. Скарыстаўшыся момантам, ён паведаміў сабраным, што граюць музыкі (разам з Лявонам выступаў яшчэ адзін гітарыст) і на вяселлях. І заклікаў прыхільнікаў запрашаць іх на свае вяселлі, маўляў, і песню на такі выпадак спецыяльна напішам.
Больш выступаў з “Куплетамі і прыпевамі” музыка не плануе.
Оцените статью
1 2 3 4 5Избранное