1980-2018: жыхар Гродна сабраў унікальны фотаархіў гарадскога жыцця

Цягам трох дзесяцігоддзяў Мікола Таранда фіксуе на фота культурнае і палітычнае жыццё гарадзенцаў.

Тут і далей фота з архіва Міколы Таранды

19 студзеня Мінску адчынілася выстава фатографа Пятра Таранды, якая складаецца з унікальных здымкаў беларускай правінцыі 1950−1960-х гадоў. Фота да шырокай публікі данёс пляменнік фатографа з Гродна Мікола Таранда, які таксама можа пахваліцца вялікім архівам здымкаў.

Апошнія тры дзесяцігоддзі ён узначальвае гісторыка-культурнае грамадскае аб’яднанне «Паходня» — найстарэйшую дэмакратычную арганізацыю Гродна. Магчыма, ягоныя фота саступаюць у якасці і мастацкасці дзядзькавым здымкам, але іх гістарычная вартасць не падлягае сумневам.

Цягам трох дзесяцігоддзяў Мікола Таранда фіксуе на фота культурнае і палітычнае жыццё Гродна і яго жыхароў. Літаратурныя сустрэчы, мастацкія плэнеры, палітычныя кангрэсы і выбарчыя кампаніі і замежныя вандроўкі. Мясцовыя літаратары і палітыкі, а таксама госці з Мінска ды іншых гарадоў Беларусі.

Адзін з раздзелаў архіву кіраўнік «Паходні» назваў «Альбом, дзе амаль кожны сябе можа пабачыць, 1997-2003». І гэта праўда. Кожны, хто хоць у паўсілы ўдзельнічаў у грамадскім жыцці Гродна ў азначаны перыяд, можа адшукаць сябе на здымках Міколы Таранды.

Многіх герояў здымкаў ужо няма ў жывых: паэты Генадзь Бураўкін, Рыгор Барадулін і Юрка Гумянюк, палітыкі Міхась Ткачоў, Валеры Фралоў і Міхаіл Марыніч, а. Аляксандр Надсан, журналіст Вітаўт Мартыненка ды інш.

Пабачыць унікальны фотаархіў Гродна можна на старонцы Міколы Таранды ў Фэйсбуку (1980-1990-я,1997-2003-я,«Паходня», 2018).

Экалагічны летнік

У цэнтры —кіраўнік менскага таварыства «Талака» Сяржук Вітушка

Мітынг на стадыёне, апошнія гады існавання СССР

З айцом Аляксандрам Надсанам, які прывозіў у Беларусь гуманітарную дапамогу, у тым ліку лекі

Гурт «Мроя». Знайдзіце лявона Вольскага на фота

Браты Грыцкевічы Валянцін і Анатоль у Вільні

Нацыянальная эліта Беларусі на адным фота: Яўген Кулік, Мікола Еррмаловіч, Міхась Ткачоў Аляксей Марачкін ды іншыя. Вільня

Мікола Таранда з Вітаўтам Мартыненкам

Уладзімір Арлоў, Генадзь Сагановіч і Віктар Шалкевіч каля колішняй каралеўскай рэзідэнцыі ў Гродне

Госьці з Мінска

Аўтар тэкста атрымлівае аўтограф ад свайго будучага працадаўцы Андрэя Дынько. Сустрэча з рэдактарамі «Нашай Нівы» і ARCHE щ Гродне, пачатак 2000-х