Усясьветны банк расказаў, як будзе расьці беларуская эканоміка
У бліжэйшыя два гады тэмпы эканамічнага росту ў Беларусі будуць даволі сьціплыя — каля 2%. Рост ВУП у 2017 годзе складзе 1,8%, у 2018–2019 гадах — 2,1 і 2,4% адпаведна. Такія прагнозы зрабілі экспэрты Ўсясьветнага банку ў сваім штогадовым эканамічным аглядзе.
«Захаваньне даволі нізкіх тэмпаў эканамічнага росту зьвязанае са структурнымі недахопамі, якія стрымліваюць патэнцыял росту Беларусі і пагаршаюць стан унутранага попыту», — робяць выснову экспэрты.
Такім чынам, Беларусь застаецца ў зоне нізкіх тэмпаў эканамічнага росту. Але гэта не прысуд. Ёсьць рашэньні, канкрэтныя крокі, якія дазволяць Беларусі вярнуцца да вышэйшых тэмпаў росту, лічыць новы кіраўнік прадстаўніцтва Ўсясьветнага банку ў Беларусі Аляксандар Крэмэр.
Аляксандар Крэмэр
— Першая ўмова — гэта паляпшэньне ўмоваў для прыватнага прадпрымальніцтва. Другая — вырашэньне праблемы неэфэктыўных дзяржаўных прадпрыемстваў (у такіх сфэрах, як канкурэнтаздольнасьць, карпаратыўнае кіраваньне, закупы, прадстаўленьне крэдытных рэсурсаў. Трэцяя — укараненьне тэхнічных і арганізацыйных інавацый, — перакананы Аляксандар Крэмэр.
Складанай застаецца сытуацыя ў дзяржсэктары
Гэта адзін з фактараў, які будзе нэгатыўна ўплываць на рынак працы і патэнцыял росту эканомікі.
— Няпросты фінансавы стан і высокая закрэдытаванасьць прадпрыемстваў прывядуць да зьніжэньня здольнасьці кампаній, асабліва ў дзяржаўным сэктары, павышаць узроўні занятасьці, — лічаць эканамісты Ўсясьветнага банку.
Да таго ж працоўная міграцыя ў суседнія краіны можа прывесьці да скарачэньня колькасьці працоўнай сілы і стварыць дадатковы ціск на фонды сацыяльнай абароны і бюджэту.
Неабходна павышаць эфэктыўнасьць дзейнасьці дзяржпрадпрыемстваў. Нават у даволі пасьпяховых заводаў ёсьць недахопы ў пляне продажу, выхаду на новыя рынкі, узаемадзеяньня з замежнымі партнэрамі.
— Каб ажывіць эканамічны рост, неабходна павышаць прадукцыйнасьць працы. Калі Беларусь хоча павысіць узровень жыцьця — павінен быць рост прадукцыйнасьці працы. Простае павышэньне заробкаў, якое перавышае рост прадукцыйнасьці працы — нестабільнае, — выказаў меркаваньне Карлас Сьміт, старшы эканаміст Усясьветнага банку, які адказвае за Беларусь.
На думку кіраўніка прадстаўніцтва Ўсясьветнага банку ў Беларусі Аляксандра Крэмэра, у справе павышэньня эфэктыўнасьці эканомікі ёсьць два шляхі: прыватызацыя дзяржаўных прадпрыемстваў і стварэньне аднолькавых умоваў для дзяржаўных і прыватных прадпрыемстваў.
Рынак працы: дысбалянс паміж стабільна нізкім узроўнем беспрацоўя і дэкляраваным ростам занятасьці
Усясьветны банк не праводзіў дэталёвай ацэнкі рынку працы. Для сваіх справаздач, экспэртных ацэнак эканамісты карыстаюцца афіцыйнымі дадзенымі Нацыянальнага статыстычнага камітэту.
— Але мы бачым сыгналы, што сытуацыя на рынку працы складаная: афіцыйны ўзровень беспрацоўя не павышаецца, хоць узровень занятасьці, паводле Белстату, расьце. Гэта азначае, што дадзеныя не зусім карэктныя, — кажа эканаміст Кірыл Гайдук.
Рэкамэндацыі Ўсясьветнага банку — павялічыць долю прыватнага сэктару, што прывядзе да павышэньня занятасьці насельніцтва. Трэба глядзець не на працэнт беспрацоўя, а на тое, якая колькасьць насельніцтва занятая ў вытворчасьці.
Рызыкі пагаршэньня каньюнктуры
Экспэрты Ўсясьветнага банку адзначаюць некалькі асноўных рызыкаў, зьвязаных са зьнешнімі фактарамі:
- Вялікі зьнешні доўг — а каб яго пагасіць, патрэбна дарагое рэфінансаваньне. «Нягледзячы на тое, што першасны дэфіцыт рахунку бягучых апэрацый скараціўся, вялікія патрэбы ў зьнешнім фінансаваньні (чакаецца, што выплаты, зьвязаныя са зьнешнім дзяржаўным доўгам, у 2018 годзе складуць 3,1 мільярда даляраў) па-ранейшаму ствараюць рызыку пашырэньня зьнешніх дысбалянсаў», — лічаць эканамісты Ўсясьветнага банку. Нафтагазавыя дамоўленасьці, заключаныя ў 2017 годзе, выпуск эўрааблігацый часова зьнізілі ціск на плацёжны балянс, але патрабуецца больш устойлівае рашэньне праблемы зьнешняга фінансаваньня.
- Беларусь адчувальная да валятыльнасьці паставак сырой нафты з Расеі і ваганьня ўсясьветных цэнаў на сыравіну. Зьмяненьні ў любым з гэтых аспэктаў могуць стварыць складанасьці з атрыманьнем дадатковых валютных паступленьняў, неабходных для абслугоўваньня дзяржаўнага доўгу.
- Павышаныя рызыкі далярызацыі ў эканоміцы: 63% дэпазытаў народ трымае ў замежнай валюце.
Станоўчыя фактары, якія адзначыў Усясьветны банк
- Рэальная заработная плата сёлета вырасла на 3,8%.
- Беларусь дасягнула самага нізкага ўзроўню інфляцыі за апошнія гады: 5,3% у кастрычніку.
- Зьнізіўся і стабілізаваўся ўзровень крэдытаў, якія не працуюць.
- Станоўчы рост золатавалютных рэзэрваў.
У сакавіку будзе разгледжана новая стратэгія ўзаемадзеяньня зь Беларусьсю
У сакавіку 2018 году Рада дырэктараў Усясьветнага банку разгледзіць новую краінавую стратэгію па ўзаемадзеяньні зь Беларусьсю да чэрвеня 2020 году, сказаў Аляксандар Крэмэр.
Акцэнт будзе зроблены на трох кірунках. Першы — дапамога Ўсясьветнага банку ў пытаньнях павышэньня эфэктыўнасьці эканомікі за кошт разьвіцьця прыватнага сэктару і павелічэньня прадукцыйнасьці сэктару дзяржпрадпрыемстваў.
Таксама Ўсясьветны банк будзе разьвіваць супрацоўніцтва зь беларускімі ўнівэрсытэтамі, дапамагаць у павышэньні кваліфікацыі.
Трэці накірунак — падтрымка інфраструктурных праектаў, інвэстыцыі ў сэктар цэнтралізаванага ацяпленьня і водазабесьпячэньня.
Оцените статью
1 2 3 4 5Читайте еще
Избранное