«Гальшанскі замак–2013»: без прывідаў, але з рыцарамі

У перадапошнюю суботу жніўня мястэчка Гальшаны прыняло гасцей IV фестываля сярэднявечнай культуры «Гальшанскі замак-2013».

За 50 тысяч рублёў (менавіта столькі каштаваў уваходны квіток), усе жаданыя маглі стать сведкамі балю у Соф’і Гальшанскай, на якім артысты чамусці спявалі «пад фанеру», сапраўднага рыцарскага шоў вершнікаў ад «Залатой шпоры», бугуртаў ад фэнтэзійных клубаў з Гродна і Навагрудку, турніру лучнікаў і пляцовак рамеснікаў.

Увечары наведнікаў фэсту чакаў канцэрт з удзелам сярэднявечных гуртоў і фаер-шоў. Прыехаць з Мінску ў Гальшаны, ды заплаціць 50 тысяч за ўваход – ці варта?

Наведаць Гальшаны варта проста дзеля таго, каб убачыць сапраўднае беларускае мястэчка з руінамі легендарнага замку і прыгожым касцелам са сваёй непаўторнай атмасферай, якую не псуюць ні бетонныя слупы ля замку, ні палаткі гандлю, ні традыцыйныя амапаўцы з міліцыяй.

Конныя рыцары трымалі аўдыторыю некалькі гадзін, дэманструючы валоданне выездкай, турнір на коп’ях, мячах і іншыя забаўкі кшталту разрубання яблыка на поўным галопе, ці падыманне кап’ем хусткі з зямлі. Пасля афіцыйнай праграмы ўсе жадаючыя маглі пакатацца на конях.

Традыцыйны для такіх мерапрыемстваў горад майстроў прапаноўваў сувеніры з керамікі, саломы, дрэва і вырабы кавалёў. Знайшоўся і мясцовы пчаляр, які гандляваў сваім салодкім таварам. Падсілкавацца можна было і шашлыком, запіўшы яго на дзіва смачным мясцовым квасам.

Цікава, але нават пасля завяршэння рыцарскай часткі фестывалю гледачы не спяшаліся раз’язджацца, застаючыся на канцэрт і абавязковае зараз фаер-шоў, якое карыстаецца заслужанай прывабнасцю ў гледачоў з-за сваёй відовішчнасці.

Добры, хоць і немудрагелісты фестываль, на які прыехалі не толькі беларусы, але і дзесяткі замежнікаў з Польшчы і Літвы.